Мени
Затвори
Совети од авторите на „Forbes“: 6 основни навики кои прават да бидете добар менаџер
Ако пребарате на „Google“ што е тоа менаџер односно, која е основната дефиниција на поимот менаџер ќе најдете една главна која веднаш излегува во одвоен прозорец: личност која е одговорна за контролирање или администрирање на цела или дел од компанија или слична организација.
Едногласно може да се заклучи – звучи едноставно, значи поголема плата и повеќе успеси.
Но, не е сè така едноставно како што навидум изгледа.
Постојат неколку основни работи кои треба да ги знае секој менаџер, а ние ќе се послужиме со оние кои ги наведува „Forbes“, едно од најпознатите бизнис списанија:
- Треба да имате „отворен“ начин на гледање на работите
Што значи тоа? Менаџерите треба да бидат флексибилни, да се адаптираат на средината и условите кои ги наложуваат моменталните ситуации и секогаш треба да проценуваат кои се можностите кои треба да ги искористат за напредување не само на компанијата, туку и на вработените во компанијата.
Менаџерите треба да имаат пред сè отворен ум за идеите и советите од своите вработени, бидејќи тие се личностите кои секојдневно се соочуваат со целите и задачите на компанијата.
Што вели Виктор Липман? „Не се плашете да избегате од парадигмата – Вака отсекогаш се извршувале работите во оваа компанија.“.
- Очекувате перфекционизам
Поставете високи цели не само лично за себе, не само според барањата на надредените и општо целата компанија, туку и за вработените. Поставете високи цели, но не недостижни цели.
Ако вие имате високи стандарди, поголема е веројатноста дека и вашите вработени ќе целат кон повеќе.
- Бидете сигурни дека вработените знаат на што сакате да се фокусирате
Високите стандарди и цели не треба да бидат креирани само во вашата глава, туку да најдете добар начин и форма како да ги претставите и на оние кои се под вас, да можат да ги разберат и остварат.
- Штитете го вашето време како што си ги штитите и очите
Никој не може да ја негира парадигмата – Времето е пари. Повеќе од тоа, времето е шанса за успех, напредок и остварување на целите.
Важно е да имате на ум дека тоа не значи избрзување на работите, туку креирање на одредена временска рамка за извршување на активностите во која ќе бидете сигурни дека секој може квалитетно да ја заврши својата работна задача и одговорност.
- Комуницирајте редовно
Како што ова важи за љубовните врски, така важи и за работните односи. Постојаната комуникација е една од најважните и најосновните работи која ја остварува секој успешен менаџер.
Бидете тука активно да ги слушате сите околу вас, внимателно да проценувате и да давате „фидбек“.
„Подобро е да бидете физички одалечени и лесни за комуникација, отколку да бидете физички близу, но да бидете далечен комуникатор.“ – вели Липман.
- Не ги избегнувајте конфликтните ситуации, туку соочувајте се со нив
Работната средина е плодно место за појава на секаков тип на конфликти. Некој сака поголема плата, некој смета дека неправедно не добива напредување, друг смета дека колегата кој седи до него го презира…
Можете да бидете во искушение да ја свртите главата на овие „мали“ проблеми, но наместо да ги избегнувате треба ефикасно да се соочувате со нив.
Како што велеле старите: „Подобро е да спречите, отколку да лечите.“